All Mëttwoch presentéiere mir Iech op eisem Internetsite, mee och op eiser Facebook Säit, e Bäitrag iwwert e Klima- an/oder Ëmweltthema.
Mir wënsche vill Freed beim Liesen an Entdecken!
2024
Nohalteg Feierdeeg? Mat eisen Tipps guer net emol esou schwéier:
- selwergemaachte Kichelcher loosse sech och gutt an engem Glas verschenken
- wéisou net Är Kaddoen an Zeitungspabeier apacken?
- de Virdeel vu selwergemaachter Deko: Dir kënnt Äre perséinlechen Touch erabréngen an d'nächst Joer ass se och nach gutt
- wann Dir frou mat natierlecher Deko sidd, probéiert dach emol gedréchent Blummen
- wéisou net Är Chrëschtwënsch dëst Joer per E-mail verschecken?
Kuckt Iech eise Video op Youtube un!
De 4. Dezember huet de Kleeschen Tiitercher un d'Kanner aus der Gemeng verdeelt. Der Gemeng an dem Kleeschen war et wichteg, dass d’Produiten an der Tiitche vum fairen Handel kommen!
Réckbléck op eng Woch gefëllt mat ville verschiddenen Naturaktionen:
- Mëttwoch 27.11.: Planzaktioun am Bësch mat J.P. Morgan, zesumme mat eisem lokale Fierschter
- Donneschden 28.11.: Verdeelung vu Bieresträicher un d'Awunner
- Freiden 29.11.: Pflanze vun Hecken a Sträicher zesumme mat de Schüler an der Maarkollef asbl bei der Musekschoul
- Samschden 30.11.: Installatioun vun Nistkästen ronderëm de Chalet vun de Scouten um Sennengerbierg mat Membere vum NaturTeam
24 Kanner aus der Gemeng, déi 2023 op d’Welt komm sinn, kruten den 23. November 2024 12 Beem gesat. Et woeren dat Quetschen-, Mirabellen- Prommebeem. Bei dëse Beem handelt et sech ëm al, regional Zorten, déi beschtens un déi lokal Gegebenheeten ugepasst sinn. Geplanzt ass ginn op engem potentiell ganz wäertvollen Terrain, no beim Naturschutzgebitt ,,Aarnescht''.
No der Planzaktioun konnte sech Grouss a Kleng mat Gegrilltem, Kuch an Taart stäerken. De Fierschter a seng Ekipp woere fir de Catering zoustänneg an hunn all Kand als Erënnerung un dësen Dag e Schneidbriedchen aus einheimeschen Holz mat dem agravéierten Numm vum Kand geschenkt.
Dës Aktioun gouf zesumme vum Naturteam vun der Gemeng, dem SIAS an der ANF organiséiert.
Méi Fotoe fannt Dir an eiser Mediathéik!
100 Beem am Joer an der Gemeng planzen, dat ass d'Zil, dat sech de Schäfferot gesat huet. Fir 2024 hu mir dëst Zil erreecht, an deene leschte Wochen huet eise Gäertnerdéngscht nämlech weider fläisseg Beem duerch déi ganz Gemeng geplanzt. Dëst Zil soll natierlech och an deenen nächste Jore realiséiert ginn. Wann Dir also Plazen an der Gemeng kennt, wou nach Beem bäikomme kéinten, da loosst eis et wëssen!
De Projet ,,Boost Lokal - Lëtzebuerg'' huet als Zil de lokale Commerce ze promovéieren. Zesumme mam CELL gëtt aktuell un engem neie Grupp an der Regioun Zentrum-Oste geschafft. Wëllt Dir gären Är Iddie mat an dëse Grupp afléisse loossen, da kommt den 21. November op de Startevent am Ôpen zu Jonglënster.
Mam Hierscht ginn d'Deeg nees méi naass. Ma dëst sinn awer och déi beschten Deeg, fir d'Reewaasser opzefänken a clever ze notzen. An der Infografik vun der Ëmweltberodung Lëtzebuerg kritt Dir déi verschidde Léisungen erkläert, fir d'Reewaasser bei Iech doheem ze sammelen an och nees weiderzeverwäerten. Kuckt Iech hei drënner eise PDF mat der Infografik an deene verschiddene Sproochen un.
Haut wëlle mir op d'Verschmotzung duerch Zigarettestëmp opmierksam maachen. Hätt Dir geduercht, dass zu Lëtzebuerg méi wéi 100 Millioune Stëmp um Buedem leien? Maacht de richtege Geste, gehäit Äre Stomp an den Äschebecher!
Quell: Facebook Campagne vun der Administration de la gestion de l'eau vum 11. Oktober 2024
Virun hirem Waassertour huet eist NaturTeam eng anonym Ëmfro lancéiert, fir den Drénkwaasserverbrauch vun den Awunner*Innen aus der Gemeng besser kënnen ze ermëttelen. Kuckt Iech hei d'Resultater un!
Dir wëllt Äert Haus dämmen, Är al Chaudière lassginn oder Ären eegene Stroum produzéieren? Plangt Dir, en Elektroauto ze kafen oder eng Luedstatioun doheem ze installéieren?
- Rendez-vous op aides.klima-agence.lu fir de Montant vun de Bäihëllefen ze simuléieren, vun deenen Dir profitéiere kënnt
- Dir kritt hei eng komplett Iwwersiicht iwwert d'Subventiounen: vum Staat, vun der Gemeng a vun den Energiefournisseuren
- De Simulator liwwert Iech zolidd Informatiounen, fir déi éischt Discussioune mat ärem Handwierker unzefänken
Onofhängeg a gratis Berodung: klima-agence.lu • 8002 11 90
D'NaturTeam, an Zesummenaarbecht mat der Gemeng Nidderaanwen, invitéiert op en interessanten Tour ronderëm d'Waasser.
Wéini?
De Samschdeg, 12. Oktober 2024 vun 9:00 bis 14:00 Auer beim Centre de Loisirs ,,Am Sand'' vu wou aus de Bus geholl gëtt.
Um Programm:
- Besichtegung vun de Quelle ,,Waasserwee” op Hueschtert: mat Erklärunge vum Herr Laurent Kettmann, Préposé vum Waasserdéngscht vun der Gemeng Nidderaanven, iwwert d'Drénkwaasser. Wou kënnt d'Waasser hir? Wéi kënnt et an de Krunn? Hei kritt Dir op der Plaz vun der Mme Fabienne Boes, Waasserbeoptragte vum SIAS, eng Degustatioun vu verschiddene Waasserzorten an eng fachmännesch Erklärung heizou
- Visitt vum Waassertuerm um Sennengbierg
- Visitt vun der Kläranlag zu Iwwersiren, wärend där d’Mme Danièle Mousel, Ingénieur-Directeur vum SIDEST, doriwwer schwätzt, wéi eist Waasser erëm propper gemaach gëtt
- Rendez-vous virun der Gemeng, wou Dir mam Herr Stephan Müllenborn, Responsabele vun der „Flusspartnerschaft Syr“, d’Propretéit vun der Bouneschbaach test, dëst mat Hëllef vun der App „WaterLinx“
- géint 13:00 Auer: Anti-Gaspi Mëttegiessen am Centre de Loisirs ,,Loisi'' a gläichzäiteg signéiert d'Autorin Martine Konijnenberg hiert Kanner-Buch ,,Waasser kënnt dach aus dem Krunn, oder net?''
- Avis aux amateurs: nom Mëttegiesse kënnt Dir nach déi interessant Ausstellung ,,Eau circulaire'' vun der Administration de la gestion de l'eau am Centre de Loisirs ,,Am Sand'' besichen (op vum 12.10. bis den 21.10.2024)
Aschreiwung bis den Donneschden, 10. Oktober 2024 um 12:00 Auer, via christiane.bour@niederanven.lu!
D‘KlimaTeam Nidderaanwen sicht motivéiert Persounen, déi an der Gemeng wunnen, schaffen oder an engem Veräin engagéiert sinn. D'Team ass aktuell ee klenge produktive Grupp a sicht nach no Verstäerkung fir zukünfteg Aktiounen ëmsetzen ze kënnen. Wann Dir interesséiert sidd, un der nohalteger Entwécklung vun der Gemeng matzewierken, da mellt Iech bei eis:
- per E-mail via kevin.becker@niederanven.lu
- andeem s Dir eise Formulaire iwwert d'Biergerbedeelegung ausfëllt
Mobilitéitswoch an der Gemeng Nidderaanwen - Mir kucken zréck op e flotte Programm: Mëtscheverdeelung fir d'Pedibuskanner a fir d'Leit, déi de Bus huelen, de Mobilitéitsdag leschte Samschden, an eis Infocampagne op de soziale Medien iwwert d'Mobilitéitsoffer an der Gemeng!
Als eng vun 18 Gemenge sinn mir am Klimapakt mat der Goldzertifikatioun ausgezeechent ginn. Fannt hei e flotte Video mat Erklärungen zu verschiddenen Aktiounen, déi mir um Wee fir Gold ausgeschafft hunn.
Zesumme mat der Ëmweltkommissioun organiséiere mir och dëst Joer nees e puer flott Aktiounen am Kader vun der Europäescher Mobilitéitswoch. Dorënner ee Biergerworkshop iwwert en zirkuläre Gemengebus, an natierlech eisen traditionelle Mobilitéitsdag.
Fir méi Informatiounen, kuckt Iech eise Flyer iwwert d'Europäesch Mobilitéitswoch un!
Hutt Dir schonn e gielt Band un engem Bam gesinn? Bei den Uebstbeem, déi mat esou engem Band gekennzeechent sinn, dierft Dir d'Äppel, Quidden, Kiischten, Mirabellen, Bieren, Quetschen oder och Drauwe plécken. Zerwéiert Iech an hëlleft mat ze evitéieren, dass all Joer kiloweis Uebst an de Gäert an op ëffentleche Plaze fault! Fannt hei drënner d'Standuerter an d'Uebstzorten, déi et an der Gemeng ginn.
Scho gewosst? De Stat ënnerstëtz net nëmme Privatpersounen bei der Installatioun vu Photovoltaik-Anlagen, mee och Societéite bei der Installatioun vu méi groussen Anlagen.
Dofir leeft aktuell nach bis den 31. Oktober 2024 en Appel d'Offre fir Photovoltaik-Groussanlagen, bei deenen de Staat ee maximale Budget vun 23 Milliounen Euro zur Verfügung stellt.
Méi Informatioune fannt Dir op guichet.public.lu.
D'Virdeeler vum Eegeverbrauch
Eng Fotovoltaikanlag generéiert Stroum, deen Dir entweder direkt verbrauchen oder géint eng Bezuelung an d'Netz speise kënnt. D'Notze vum eegene Stroum fir elektresch Geräter un d'Goen ze kréien, fir eng Wärmepompel oder fir Är Elektroautoe ka rentabel sinn, virun Allem, wann de Stroumpräis vun Ärem Stroumfournisseur méi héich ass, wéi de Revenu aus dem Verkaf vun Ärem an d'Netz gespeiste Solarstroum.
Doriwwer eraus kann den Asaz vun engem Batteriespäicher eng Plus-value fir den Eegeverbrauch duerstellen, andeem iwwerschëssege Solarstroum an der Nuecht genotzt ka ginn. Opgrond vum Ressourcenopwand, deen net ze vernoléissegen ass, an den héije Käschten, proposéiere mir allerdéngs e virsiichtegt Dimensionéiere vun der Batterie.
Eng weider interessant Optioun ass de kollektiven Eegeverbrauch. Dir kënnt de generéierte Stroum mat Ären Noperen deelen an esou d'Rentabilitéit vun Ärer Solaranlag erhéijen.
Méi iwwert den Eegeverbrauch: klima-agence.lu/pv
D'gratis Tools vun der Klima-Agence
Fir d'Machbarkeet an d'Rentabilitéit vun Ärem Projet ze bewäerten, kënnt Dir den nationale Solarkataster notzen, deen ënner energie.geoportail.lu ze fannen ass. Dësen Tool identifizéiert d'Standuerter mat der héchster Sonnenastralung a bitt eng Funktioun fir den Eegeverbauch, déi et dem Notzer erméiglecht, säi Verbrauch ze schätzen an déi optimal Investitioun ze bestëmmen.
Ënner aides.klima-agence.lu kënnt Dir mat nëmmen e puer Klicks de Montant vun de Bäihëllefe vum Staat, de Gemengen an den Energiefournisseure simuléieren.
Onofhängeg a gratis Berodung vun der klima-agence.lu • 8002 11 90
Mat de wuessenden Erausfuerderunge vum Klimawandel gëtt e verantwortungsvollen Ëmgang mat de Waasserressourcen essenziell. An der neister Infografik vun der Ëmweltberodung Lëtzebuerg gitt Dir op véier Sprooche gewuer, wéi Dir d'Reewaasser clever notze kënnt.
Scho gesinn? Bei all eise Baache fannt Dir aktuell eng Beschëlderung, déi Iech den Numm, de Verlaf, hir Längt a weider Informatiounen dozou ginn. Dës Aktioun huet d'Flusspartnerschaft Syr mat hire Membergemengen op Initiativ un eiser Ëmweltkommissioun ausgeschafft.
Wosst Dir, dass et zu Lëtzebuerg méi ewéi 300 Zorte vun Harespele ginn an nëmmen 2 Zorten e potentielle Konflikt fir de Mënsch duerstellen? Harespele sinn nëtzlech Déieren a spillen eng grondleeënd Roll am Gläichgewiicht vun der Natur. Wéi erkennt een eng Harespel, wéi soll ee se schützen a wéi lieft een am Beschte mat hinnen zesummen? All dat gitt Dir am Guide vun der Ëmweltberodung Lëtzebuerg gewuer.
Maacht Dir dëst Joer och beim Vëlosummer mat? Vum 27. Juli bis de 25. August 2024 ginn Iech 14 verschidden Touren duerch Lëtzebuerg proposéiert fir eist Ländche mam Vëlo ze entdecken. Een dovunner ass de Sir-Uelzechtdall-Tour, deen och duerch eis Gemeng geet. Probéiert en aus!
Wosst Dir, dass aus Äre gesammelte Rostoffer bei Minett-Kompost en héichwäertege Qualitéitskompost an erneierbar a klimafrëndlech Energie entstinn? Dëst ass awer nëmme méiglech, wann Dir am Virfeld Är organesch Offäll an Är Biopoubelle geheit an dobäi Plastikstoffer evitéiert. Infoen an Tipps, wéi Dir organesch Offäll richteg trennt, fannt Dir dës Woch an Ärer Boîte an hei drënner!
Baséierend op d'Analys vun eisen Aktivitéite vun 2022 an 2023, krute mir de Méinden, 8. Juli, eise Zertifikat als Fairtrade-Gemeng fir d'Joer 2024 an 2025 erneiert. Mir sinn houfreg eng Fairtrade-Gemeng ze sinn a mat eisen Efforten de fairen Handel ze ënnerstëtzen an eise Bierger.Inne méi no ze bréngen!
De Freiden, 28. Juni, hate mir déi grouss Éier, deen zweeten nationalen NaturPakt-Dag zu Nidderaanwen ze hosten. Gestart gouf moies mat 4 thematesche Visitten, wärend deenen engersäits Aktioune fir de Schutz vun der Biodiversitéit am urbane Raum, anerersäits d'Naturschutzgebidder Aarnescht a Mensder Brill besicht goufen.
Am Nomëtteg sinn no engem kuerzen Austausch vu Best-practice-Aktiounen nach d'Zertifikatioune fir d'Joer 2024 verdeelt ginn. Och mir hu vum Här Minister Serge Wilmes d'Bronze-Zertifikatioun mat iwwer 50% erhalen an hunn domat an engem Joer eng Verbesserung vun iwwer 10% erreecht.
Copyright Fotoen: Klima-Agence
Wat eng super Leeschtung!
Mir kruten d'Zuele vum Reschtoffall vum SIDOR an d'Statistike verzeechne ganz kloer eng kontinuéierlech Baisse vum Offall dee pro Awunner pro Joer an der groer Poubelle lant. Loosse mer all esou weiderfueren an eisen Offall richteg triéieren!
Ëmmer nees e flotte Rendez-vous fir seng handwierklech Fäegkeeten op d'Prouf ze stellen a futtisse Géigestänn en neit Liewen ze schenken. Um Repair Café de leschte Samschde konnte vu 34 Objeten 19 reparéiert a 7 deelweis gefléckt ginn.
De Freiden, 7. Juni, hu mir als Gemeng am Kader vum KlimaPakt 2.0 eist Zertifikat iwwerreecht kritt. Mir hunn iwwer 80% vun de Mesüren ëmgesat a gehéiere lo zu enge vu 17 Gemenge mat enger Gold-Zertifizéierung. Zousätzlech hu mir nach d’thematesch Zertifizéierung an der Kreeslafwirtschaft erhalen. Soumat si mir réischt déi zweet Gemeng, déi dës Kombinatioun vu Goldzertifizéierung an der Zertifizéierung zur Kreeslafwirtschaft iwwerreecht kritt huet. E grousse Merci un all d'Leit, déi doru bedeelegt waren!
© Fotoen: Klima-Agence
Als eng vun insgesamt véier Gemengen hu mir d'Éier dës Woch als Lëtzebuergesch Delegatioun un der Woche der Umwelt deelzehuelen, déi am Gaart vum Schlass Bellevue zu Berlin stattfënnt. Hei erwaarden eis en interessante Fachprogramm, konstruktiv Diskussiounen, sou wéi eng grouss Ausstellung mat ronn 190 Exposanten aus de Beräicher Wirtschaft, Technik, Forschung a Wëssenschaft.
Krut Dir scho mat, dass et zënter Kuerzem 2 Hondswisen an eiser Gemeng ginn? Wann net, dann ass haut de perfekten Dag fir dës mat Ärem treie Begleeder entdecken ze goen:
- Parc de l'Europe, Ueweraanwen
- Gromscheed II, Sennengerbierg
Endlech ass et nees esou wäit! De Samschden, 15. Juni 2024, ass nees vun 9h00 bis 13h00 Repair Café an eiser Gemeng. Wann Dir Géigestänn hutt, déi gefléckt solle ginn, oder Dir beim Flécken hëllefe wëllt, da kommt laanscht!
De Ministère fir Ëmwelt, Klima a Biodiversitéit (MECB) organiséiert dëst Joer, a Kollaboratioun mat senge Partner-Organisatiounen, déi drëtt Editioun vun de „B&B Action Weeks“, den Aktiounswoche ronderëm bestëbsend Insekten. Dës Aktiounswoche schreiwen sech an den Enn 2021 vun der Regierung verëffentlechten nationalen Aktiounsplang fir bestëbsend Insekten an, a bidden eng optimal Geleeënheet, bei Excursiounen a Workshops déi faszinéierend Welt vun de bestëbsenden Insekten ze entdecken. Doriwwer eraus gëtt ee gewuer, wéi mer eis Bestëbser schützen a fërdere kennen.
Dëst Joer fannen d'B&B Action Weeks fir eis Bestëbser vum 17. Mee bis 9. Juni 2024 statt. De ganze Programm fannt Dir hei: www.bbweeks.lu
Als zertifiéiert Fairtrade-Gemeng maache mir och dëst Joer nees bei de Fairtrade-Woche mat!
Sou kënnt Dir nach bis de 15. Mee op d'Gemeng eis Ausstellung besichekommen an Iech natierlech och um Jus a Schockela zerwéieren, dee mir fir Iech prett gestallt hunn.
Doriwwer eraus hat eis Ëmweltkommissioun en Infostand wärend der leschter Editioun vum Maart a wäert och fir d'Hueschterter Kiermes vum 9. bis 12. Mee mat engem Stand vertruede sinn.
Huelt deel um 2. regionale Klima- a Biodiversitéitsdag, organiséiert vum Ëmwelt- an Naturschutzsyndikat SIAS den 12. Mee 2024 am Ressourcenzenter Minsbech. Erlieft Atelieren, eng interaktiv Kannervirstellung, Stänn a Live Virträg iwwer Klima- a Biodiversitéitsschutz, Energie, Ressourcen, Landwirtschaft an Naturschutz. Entdeckt nei Weeër fir mat klenge Schrëtt grouss Saache z'erreechen. Jiddereen ass wëllkomm, ganz onofhängeg vum Alter!
- Iessen a Gedrénks de ganzen Dag
- kommt op eng ëmweltfrëndlech Manéier - ze Fouss, mam Vëlo, Zuch oder Bus (Shuttle Bus vu Minsbech Gare)
Wat eng flott Aktioun!
De leschten Donneschden huet eng Ekipp vun J.P. Morgan hiren Teamdag an d'Natur verluecht an hir eege Grouss Botz organiséiert. Eise Responsabel fir Energie, Ëmwelt an nohalteg Entwécklung huet der Ekipp gehollef dës Aktioun op d'Been ze stellen, en Tour definéiert, a se mat deem néidege Material fir Dreck opzerafen ausgestatt.
Dir sidd e Betrib an der Gemeng Nidderaanwen a wëllt iech och fir d'Ëmwelt um Territoire vun der Gemeng asetzen? Da kontaktéiert eis a loosst eis zesummen är perséinlech Ëmweltaktioun mat ärer Ekipp organiséieren.
Wéi wier et wa Wärmepompelen Iech... eng effizient an ëmweltfrëndlech Léisung fir d'Hëtze vun Ärer Wunneng bidde géingen?
An enger Zäit, an där de Fokus op nohaltege Léisunge läit, gewanne Wärmepompelen ëmmer méi u Bedeitung. Dës bewäert Technologie bitt net nëmmen eng effizient Méiglechkeet fir d'Hëtze vu Gebaier, ma ass och eng villverspriechend Alternativ, fir d'Ëmweltauswierkungen ze miniméieren.
Well Wärmepompelen notzen déi an der Ëmwelt verfügbar Wärmeenergie, sief et an der Loft oder am Buedem, fir d'Hëtzt ze generéieren. Fir dës Effizienz ze miessen, gëtt de COP (Coefficient of Performance) erugezunn, deen d'Verhältnis tëschent der generéiert Hëtzt (kWh) an deem dofir benéidegtem Stroum (kWh) ausdréckt. Am Vergläich zu fossilen Heizsystemer bidden d'Wärmepompelen opgrond vun hirer Energieeffizienz en erhiefleche Virdeel.
Virurteeler géigeniwwer Wärmepompelen:
Et ginn ëmmer nach vill Mythen iwwer Wärmepompelen, wéi z.B. ,,Wärmepompele kënnen net an ale Gebaier agesat ginn''. Mee och an ale Gebaier ass d'Wärmepompel eng Optioun, och ënner Benotzung vun Heizkierper, déi schonn do waren. Just d'Effizienz ass an der Reegel e bësse méi geréng wéi an neie Gebaier mat Foussbuedemheizung.
Dir plangt eng Wärmepompel an Ärem Haus ze installéieren? D'Klima-Agence stellt Iech eng Check-Lëscht iwwer Wärmepompelen a Wunngebaier zur Verfügung, fir dass Dir beim Abau vun esou enger Anlag den Iwwerbléck behalt. An dëser Lëscht, déi vun den Experte vun der Klima-Agence erstallt gouf, fannt Dir Elementer, déi Dir bei der Installatioun an dem Betrib vun esou Systemer consideréiere musst: d'Astellungsméiglechkeeten vun Ärer Anlag, déi néideg Geneemegungen, d'Kontrollen, déi duerchzeféiere sinn an déi verschidden Typpe vu Wärmepompelen. D'Dokument bitt e kuerze Glossar an erkläert Fachbegrëffer, iwwer déi Dir als Laie fale kéint. Notzt och d'Berodung vun der Klima-Agence, falls Dir weider Froe sollt hunn.
Hei fannt Dir d'Checklëscht: bit.ly/3vMTlSJ
Onofhängeg & gratis Berodung klima-agence.lu • 8002 11 90
Fréijoerszäit ass Gaardenzäit! Passend zu der aktueller Saison gëtt eis d'Ëmweltberodung Lëtzebuerg asbl e puer Iddie mat op de Wee, wéi mir aus eise Gäert méi Liewensqualitéit fir d'Flora, d'Fauna an och eis selwer schëpfe kënnen.
Wëllt dir léiere wéi ee selwer ee Staudebeet uleet? Passend zum Start vun der Gaardesaison organiséiert d’Biologesch Station SIAS den 13. Abrëll de Workshop ,,Wéi leeën ech en naturnot Staudebeet un ?''. Zesumme mam Tom Dall’Armellina vun der Biologescher Statioun SIAS leeën d’Participanten ee Staudebeet un. Dir léiert dobäi alles iwwer déi verschidde Staudezorten, d’Planzen, den ideale Standuert an iwwer d’Fleeg vun engem Staudebeet. Natierlech gi mir och dorop an, wéi d’Biodiversitéit, virun allem d’Päiperleken, Bommelen a Béien, vun sou Staudebeeter profitéieren.
13. Abrëll ab 9.00 bis 12.00 Auer zu Schëtter
Mellt Iech wgl. un ënner t.dallarmellina@sias.lu oder 34 94 10 32.
De Weekend vum 22., 23. a 24. Mäerz waren eng ronn 40 Leit, verdeelt an de 7 Uertschaften, ënnerwee fir Knascht opzerafen. Bei Abrëllswieder mat Sonn, Knëppelsteng an deels Schnéi sinn d’BiergerInnen ënnert der Leedung vu Memberen aus der Ëmweltkommissioun an dem NaturTeam a klenge Gruppen duerch déi verschidden Uertschaften gaangen. Insgesamt wäerten eng ronn 75 kg Knascht gesammelt gi sinn!
Kennt Dir se schonn? natur&ëmwelt huet d'Flossséischmuewel zum Vull vum Joer ernannt!
Méi Infos fannt Dir op www.naturemwelt.lu.
Mam Fréijoersufank ass et och nees Zäit fir eng Fréijoersbotz - an zwar an der Gemeng!
Schléisst och Dir Iech eiser Ëmweltkommissioun an dem NaturTeam un an huelt de Samschden, 23. Mäerz, un der Grousser Botz deel. Umelle kënnt Dir Iech iwwert eisen online Formulaire oder via christiane.bour@niederanven.lu.
Kennt Dir schonn den online-Agenda ,,Naturaktivitéiten an eiser Regioun'' vum SIAS? Wann Dir Loscht hutt eleng, oder als Famill zesumme mat Äre Kanner, méi Zäit an der Natur ze verbréngen, da gitt bis op an den Agenda luussen an entdeckt déi vill flott Naturaktivitéiten zesumme mat de Partner vum SIAS.
Wanderfrënn opgepasst! Perfekt virum Fréijoersufank ass den Auto-Pédestre an eiser Gemeng komplett demontéiert an nei opgestallt ginn. Säin Depart befënnt sech elo beim neie Waassertuerm um Sennengerbierg a gëtt vun elo un AP Senningerberg genannt. D'Auto-Pédestren erkennt Dir un deenen neie wäisse Schëlder mat der bloer Raut.
Méi Infos iwwert den AP Senningerberg fannt Dir um Site vu Visit Guttland.
Futti? An den Dreckseemer domat! Ëmmer erëm ertappe mir eis, wéi mer déi verschiddenst Géigestänn vill ze schnell ewechgeheien, wa se dach villäicht awer nach reparéiert kéinte ginn. Mat der Serie ,,fixit! Flécken. Léinen. Notzen'', déi am Kader vum Projet ,,Rethink'' entstanen ass, gëtt eis de Mouvement Ecologique reegelméisseg Tipps an Infos fir en nohaltege Konsum mat op de Wee.
Rendez-vous op www.meco.lu.
Ass Iech ,,Vertragsnaturschutz'' e Begrëff? Dëst ass eng bewäerte
Method vum SIAS a Kooperatioun mat de Bauere fir den Naturschutz an
d'Biodiversitéit am Oppeland ze garantéieren.
Informatiounen heizou kritt Dir dës Woch vum SIAS:
Eng bewäerte Method vum Naturschutz am Oppeland ass de Vertragsnaturschutz duerch Biodiversitéitsverträg:
- Dës Verträg gi mat de Bewiertschafter vu wirtschaftlech exploitéierte Gréngland- an Akerflächen ofgeschloss, déi sech dozou bereet erklären, iwwer een Zäitraum vu fënnef Joer eng grouss Unzuel u méiglechen Naturschutzmoossnamen duerchzeféieren
- Als Entlounung fir méiglech Aboussen, déi esou eng Extensivéierung vun der Bewirtschaftung mat sech bréngt, erhalen d’Bewiertschafter eng Ausgläichs-Prime
- Am Joer 2024 lafen insgesamt 998 Biodiversitéitsverträg, déi 143 Baueren a Wënzer an de leschte fënnef Joer mat der Biologescher Statioun SIAS ofgeschloss hunn. Aleng 2024 lafen 324 nei Kontrakter un, wat déi héich Bereetschaft vun de Baueren, Naturschutzziler ze erreechen, ënnersträicht
- Sou stinn am SIAS-Gebitt 1571 ha Gréngland ënner Vertragsnaturschutz, et ginn 126 ha Bontbroochen op de Felder ugeluecht, iwwer 400 Kubikmeter Dréchemauere restauréiert an iwwer 650 Kubikmeter Doutholzhecken ugeluecht
- Insgesamt erhalen d’Baueren am SIAS-Gebitt knapp 2 Milliounen Euro pro Joer un Entschiedegungen vir hir wäertvoll Aarbecht
Am Kader vum Weltdag vun de Fiichtgebidder fënnt de Samschden, 10. Februar um 9h00 eng flott Visite guidée duerch d'Naturschutzgebitt ,,Schlammwiss - Brill'' statt. Sidd mat dobäi an entdeckt och Dir dëse wäertvolle Liewensraum fir Déieren, Insekten a Villercher!
Méi Infos op www.naturemwelt.lu.
De Méinden, 29. Januar 2024, hunn d'Schäfferéit vun de Gemengen Nidderaanwen a Schëtter, a Präsenz vum Minister fir Ëmwelt, Klima a Biodiversitéit, dem Här Serge Wilmes, an dem Minister fir Wirtschaft, PME, Energie an Tourismus, dem Här Lex Delles déi éischte Kéier op d'Receptioun mat den Entreprisen aus deenen zwou Gemengen agelueden. Eng ronn 120 Leit, dorënner Geschäftsfraen a -männer vu 56 verschiddenen Entreprisen, hunn de Wee an de Loisi fonnt, fir sech ënnertee kennenzeléieren an auszetauschen. Am Fokus stoung d'Presentatioun vun der Klima-Agence iwwert d'Moossname fir d'Energietransitioun fir Betriber, ier den Owend mat engem flotten Networking mat de Geschäftsleit, de Membere vun de Schäffen- a Gemengereit vun Nidderaanwen a Schëtter, sou wéi mat de Ministeren ofgeschloss gouf.
Sidd de Weekend vum 27., 28. an 29. Januar 2024 bei der gréisster ornithologescher Matmaachaktioun zu Lëtzebuerg dobäi an huelt och Dir un der Wantervullenzielung deel. Dës Aktioun erlabt natur & ëmwelt d'Bestänn vun den heefege Vullenaarten zu Lëtzebuerg anzeschätzen a Populatiounstrends iwwert d'Jore festzestellen.
Méi Infos fannt Dir um Site vun natur & ëmwelt.
Eng Konferenz, déi et net ze verpasse gëllt! Den Donneschden, 1. Februar, invitéiert de SIAS ganz häerzlech op de Virtrag vum Sven Plöger, iwwert d'Thema ,,Zieht euch warm an, es wird heiß''. Sidd live mat dobäi, wann eis de Meteorolog an Televisiounspresentateur an enger humorvoller, mee zugläich och eeschter Aart a Weis méi iwwert de Klimawandel zielt.
Dräi nei Vel'OH-Statioune si säit Kuerzem an der Gemeng prett fir genotzt ze ginn! Soumat ass eis Gemeng mat 5 Statiounen am Ganzen elo nach besser vernetzt, wat d'Notzung vum Vel'OH nach méi attraktiv mécht.
- Senningerberg, Château d'eau
- Hostert, Place Charly
- Oberanven, Rue d'Ernster
- Niederanven, Routscheed
- Niederanven, Rue Laach
Méi Informatioune fannt Dir op www.myveloh.lu.
Schonn héieren? D'Erhéijung vum staatleche Subsid fir ënner anerem
Photovoltaik a Wärmepompelen ass bis den 30. Juni 2024 verlängert ginn.
Profitéiert elo nach vum staatlechen a vum neie kommunale Subsid vu 50%
fir d’Notzung vun Installatiounen, déi d’erneierbar Energië fërderen!
Méi Informatioune fannt Dir an eiser Rubrik iwwer d'Subventiounen a Subsiden.
2023
Méi Sport, manner Schockela, keen Alkohol méi... Wéi wier et dann emol mat ëmweltfrëndleche Virsätz fir dat neit Joer? Wat dat fir Virsätz kënne sinn, kënnt Dir Iech hei drënner duerchliesen:
Fir de Joreswiessel ass de Gebrauch vu Freedefeier, Knupperten a Wicken um Territoire vun der Gemeng Nidderaanwen verbueden. Wéi eng negativ Auswierkunge Freedefeier huet, kënnt Dir an eiser Infographik noliesen. Gräift och Dir op flott Alternativen zréck - d'Ëmwelt an d'Déiere soen Iech Merci!
Chrëschtdag réckelt ëmmer méi. Ass de Beemche scho gerëscht? Hutt der schonn Är Kaddoe fir d'Famill an d'Frënn? A wësst der scho wat der fir de Besuch kacht? Ier et esou wäit ass, wëlle mir Iech e puer Iddie mat op de Wee ginn, wéi een nohalteg Chrëschtdag feiere kann.
Sidd Dir nach op der Sich no dem perfekte Kaddo fir d’Chrëschtdeeg?
D'Emweltberodung Lëtzebuerg gëtt eis e puer Iddien, déi eis hëllefen e
Kaddo ze fannen, deen dobäi och nach nohalteg ass.
Kuckt Iech déi flott Infographik un.
Nodeems mir eis 2023 mam KlimaPakt fir eng nohalteg Gemengegestioun verflicht hunn, hu mir elo 10 Joer méi spéit mat iwwer 80% d'Goldzertifikatioun ereecht. An deem Kader si mir zu Lörrach mam European Energy Award Gold ausgezeechent ginn.
Am Kader vum Nationalen Dag vum Bam, huet de Schäfferot, zesumme mam Gäertnerdéngscht, dem SIAS an der Natur- a Forstverwaltung de Samschden, 18. November, op d'Planzaktioun fir déi Neigebueren 2022 invitéiert. Wärend der Aktioun goufe verschidden Héichstämm a Sträich geplanzt. Fir all Kand war e Strauch fir ze setze virgesinn an no der Planzaktioun huet d'Gemengeverwaltung op e Barbecue agelueden.
Elo wou d'Temperaturen erof ginn an d'Holziewen a Schminnien esou lues ugefange ginn, gëtt eis d'Ëmweltverwaltung e puer praktesch Handgrëffer mat op de Wee, fir d'Emissioun vu Schuedstoffer geréng ze halen an esou méi ëmweltfrëndlech mat Holz ze hëtzen.
Dir hutt Doheem Bicher, Kleeder, Spillsaachen oder och Handswiersgeschier, dat Dir net méi braucht? Da bréngt et an de Recycling Center op Mënsbech - d'Second Hand Area ass nämlech nees op. Gitt bis luussen - pro Visitt kënnt Dir selwer bis zu 3 Objete mathuelen!
De Freiden, 27. Oktober 2023, ass am Gemengerot dat neit Subsidreglement fir durabelen Neibau, energeetesch Sanéierung an d’Installatioun fir erneierbar Energië gestëmmt ginn. Niewent der Erhéijung vun 30% op 50% vum Montant vum staatleche Subsid, sinn och déi verschidde Plaffongen ugepasst ginn.
Dir iwwerleet fir Äert Doheem ze renovéieren oder sidd scho konkret um plangen? Vergiesst net, vum Bäihëllefen-Simulator vun der Klima-Agence ze profitéieren. Hei kritt Dir ganz einfach eng Aschätzung vun der méigleche finanzieller Ënnerstëtzung fir Äre spezifesche Projet!
Dir wëllt aktiv d'Klima an d'Natur an eiser Gemeng fërderen? Da schreift Iech elo nach fir eist Klima- an/oder NaturTeam an a loosst eis zesumme flott Projeten an Aktivitéite realiséieren a konkret Bäiträg fir d'Ëmwelt an eiser Gemeng leeschten!
De 7. Juli 2023 gouf d'Rous ,,Andethanna'' wärend enger flotter
Zeremonie gedeeft a soll d'Awunnerinnen an Awunner aus der Gemeng
Nidderaanwen representéieren a matenee verbannen. Fir d'Rous ze éieren,
schenkt de Schäfferot all den interesséierte Stéit aus der Gemeng eng
Rous.
Wann Dir och eng wëllt, kënnt Dir nach bis de Freiden, 13. Oktober, via roberta.dario@niederanven.lu Är Commande maachen (wgl. de Vir- an Nonumm, d'Adress an d'Telefonsnummer uginn).
Eng gutt Isolatioun erhéischt d'Energieeffizienz vun Ärem Haus an
och d'Ersetze vun Ärer Gas- oder Mazoutsheizung mécht Iech manner
ofhängeg vun den Energiepräiser, déi ëmmer méi klammen.
Profitéiert elo vun der onofhängeger a gratis Berodung vun der Klima-Agence!
Scho gesinn? Op dräi verschidde Plazen an eiser Gemeng sti mëttlerweil
Drénkwaasserspender fir Waasser direkt vum Krunn ze drénken oder Äre
Bidon opzefëllen.
Der Ëmwelt zu Léift, biede mir Iech net verschwenderesch mat dëser wäertvoller Ressource ëmzegoen.
- Scouts' Home um Sennengerbierg
- Jugendhaus Nidderaanwen zu Senneng
- Parc de l'Europe zu Ueweraanwen
E klenge Réckbléck op e flotte Mobilitéitsdag an eiser Gemeng. Bei guddem Wieder hu vill Biergerinnen a Bierger ze Fouss, mam Vëlo oder mam Rollator déi proposéiert Parcourse matgemaach.
De Syndicat d'Initiative de la Commune de Niederanven (SICN) invitéiert zesumme mam ORT Centre/Ouest, der Administration de la Nature et des Forêts an der Gemeng Nidderaanwen häerzlech op d'Aweiung vum Guttland.Trail Aarnescht, de 24. September 2023.
Huelt Deel um flotte Programm ronderëm de Wanderwee duerch dat impressionnant Naturschutzgebitt Aarnescht a verbréngt mat eis e flotten Dag an der Natur.
Programm:
Start bei der Entrée vum Groussebësch, um Parking vum Fligermonument
- 10h00: offiziell Aweiung vum Guttland.Trail Aarnescht a Presenz vum Minister fir Tourismus, dem Här Lex Delles
- 10h30: Wanderung iwwert de Guttland.Trail Aarnescht mat Erklärunge vum Préposé forestier vun der Gemeng Nidderaanwen, dem Här Pit Lacour
- ca. 14h00: Eierewäin mat engem Barbecue
Am Kader vun der europäescher Mobilitéitswoch luede mir Iech de 17.
September an, un eise flotte Parcoursen duerch d'Gemeng matzemaachen.
Ob als Foussgänger, Rollstullfuerer, mam Rollator oder Vëlosfuerer (MTB
& Coursevëlo), jidderee ka matmaachen. De Start ass um 10h00 beim
Kulturhaus Nidderaanwen.
Mee duerno ass net Schluss! Bréngt virum Tour duerch d'Gemeng eng Klengegkeet fir ze iesse mat, fir duerno um Sunday Brunch vun der Kommissioun fir interkulturellt Zesummeliewen am Park vum Kulturhaus Nidderaanwen deelzehuelen.
Gutt Neiegkeeten!
Vum 10. September u fiert déi nei RGTR-Buslinn 327, déi d'Buslinn 325
ergänze soll. Den Horaire, souwéi de genaue Fuerplang fannt Dir op www.mobiliteit.lu.
Scho gewosst? Friichten einfach esou vun engem Bam plécken, ass verbueden. Dofir huet de Ministère fir Landwirtschaft, Wäibau a ländlech Entwécklung zesumme mam Syvicol schonn 2021 d'Aktioun ,,Gielt Band'' an d'Liewe geruff.
Och an eiser Gemeng fannt Dir Uebstbeem, déi mat engem giele Band
gekennzeechent sinn - hei dierft Dir d'Äppel, Quidden, Kiischten,
Bieren, Quetschen oder och Drauwe plécken.
Zerwéiert Iech an hëlleft mat ze evitéieren, dass all Joer kiloweis Uebst an de Gäert an op ëffentleche Plaze fault!
Dir hutt och en Uebstbam an Ärem Bongert stoen, dee fir d'Leit accessibel ass? Da maacht bei der Aktioun mat a kommt Iech Äert gielt Band op d'Gemeng sichen!
Interaktiv Kaart mat den Uebstbeem an eiser Gemeng: http://g-o.lu/3/H8vG
Fir e respektvollt Mateneen biede mir d'Hondsfrënn e puer Reegelen ze berécksiichtegen, wa si mat hirem treie Begleeder an der Gemeng ënnerwee sinn.
Scho gewosst? Är Demande fir e staatleche Subsid beim Kaf vun enger Fotovoltaikanlag, enger Wärmepompel, engem Vëlo, enger Luedstatioun a villes méi, kënnt Dir vun elo un digital iwwer myguichet.lu maachen!
Fir eis Ëmwelt, d'Klima an domat och eis Gesondheet ze schounen an ze schützen, proposéiert eis d'Ëmweltberodung Lëtzebuerg e puer kleng Schrëtt, déi jidderee maache kann a soumat säin Deel fir eng méi nohalteg Gesellschaft bäidroe kann.
A wann Dir Energie produzéiere kéint... mat der Sonn an op Ärem Balcon? Balconkraftwierker, oder och ,,Plug&Play''-Anlagen, si Photovoltaikanlagen, déi an der Reegel nëmmen aus zwee Modullen an engem Inverter bestinn a ganz einfach op Ärem Balcon installéiert kënne ginn. D'Leeschtung vun esou enger Anlag muss manner ewéi 800 WP sinn.
- Wéi fonktionnéiert esou eng Anlag?
- Wat ass ze consideréieren?
- Ass e Balconkraftwierk rentabel?
- Kann ech och Subside fir esou eng Anlag ufroen?
Liest Iech hei duerch den Artikel vun der Klima-Agence!
Jiddereen op de Vëlo!
Vum 10. bis den 30. September ass nees den Tour du Duerf an och eis
Gemeng mécht erëm mat. Registréiert Iech vun elo un an drot tëschent dem
10. an 30. September Är Kilometer, déi Dir mam Vëlo gefuer sidd, online
an.
Scho gesinn? Säit Kuerzem fannt Dir un der Beschëlderung am Parc de l'Europe nieft dem QR-Code och eng Plackett mam Numm vum Bam. Sou erkennt Dir op den éischte Bléck, ëm wéi ee Bam et sech handelt. Ma wann Dir weider Informatioune wëllt, kënnt Dir natierlech weiderhin de QR-Code scannen.
De Samschden, 1. Juli, huet den zweete Repair Café zu Nidderaanwen stattfonnt. Eng sëlleg Hobbyhandwierker hu gehollef, déi verschiddenste Géigestänn ze flécken. Dat Ganzt ass vun engem Fairtrade-Café accompagnéiert ginn. Ënnert dem Stréch sinn 23 vu 36 Géigestänn reparéiert ginn a soumat huet sech den Undrang par Rapport zum leschte Joer bal verduebelt.
Hutt Dir och deen een oder aneren Handy doheem leien, deen net méi benotzt gëtt? Da maacht mat beim Projet ,,Mobile Bag'' a spent Ären ale Smartphone, fir aneren den Zougang zu digitale Geräter ze erméiglechen. Säit Kuerzem fannt Dir an der Receptioun vum Gemengenhaus Mobile-Bag Enveloppen, an déi Dir Ären alen Handy dramaache kënnt an an enger Sammelstell vun der POST, oder Ärem Bréiftréier, kënnt ofginn.
Wéi ass de Mobile Bag ze benotzen?
- Huelt Är SIM-Kaart aus dem Handy raus
- Setzt Äre Smartphone am Beschten op 0. Wann Dir awer Problemer domat hutt, maachen dat och d'Ekippe vun der Digital Inclusion asbl
- Packt Ären Handy (mat oder ouni Chargeur) an d'Enveloppe a maacht se gutt zou
- Drot d'Enveloppe op eng POST Sammelstell oder gitt se direkt bei Ärem Bréiftréier of
Méi Infos fannt Dir op www.mobile-bag.lu.
De Samschden, 1. Juli 2023, fënnt eng nei Editioun vum Repair Café an eiser Gemeng statt. Wann Dir also kleng elektresch Geräter, Gezei, Vëloen, Spillsaachen oder och kleng Miwwelen hutt, déi futti sinn, an Dir hinnen eng Chance op en zweet Liewe wëllt ginn, dann ass de Repair Café déi richteg Plaz. Gesicht ginn natierlech och Leit, déi en Don hunn, fir Géigestänn ze flécken!
Wat ass ee Repair Café:
REPAIR: Repair Café ass een Treffen, bei deene Participanten zesumme mat aneren hir kapott Géigestänn reparéieren: kleng elektresch Apparater, Gezei, Vëloen, Spillgeschir, kleng Miwwel a villes méi... alles wat kapott ass, ass Wëllkomm an huet eng Chance op een zweet Liewe verdéngt.
D’ Reparéiere spuert net nëmme Geld, mee och wäertvoll Ressourcen an huet een Afloss op d’Reduktioun vun de CO2-Emissiounen.
CAFÉ: En Repair Café ass och eng Plaz, wou een sech begéint an austausche kann. Kommt eng Taass Kaffi drénken an ënnerhaalt Iech mat anere Bierger aus der Regioun: tauscht Tipps aus, initiéiert nei Projeten an hutt eng schéin Zäit zesummen.
OP DER SICH: Dir kennt Iech gutt aus mat Elektrotechnik, Holzaarbecht, Mechanik, Schneiderei, asw. a kënnt reparéieren? Kommt an ënnerstëtzt eis! De Repair Café funktionéiert nëmme mat Fräiwëlleger wéi Iech!
Haut presentéiere mir Iech de COPIL ,,Guttland Musel'' mat senger Vilfalt u verschiddene Liewensraim.
Entdeckt zesumme mam Animateur Natura 2000 Tobias Mosthaf vum SIAS
d'Naturschutzprojeten, déi vu verschidden Acteuren am COPIL ,,Guttland
Musel'' ëmgesat ginn!
Onbeléift Déiere ginn et der e puer bei eis am Land. Vu Spann, bis Harespel a Fliedermaus - mat hirer neier Campagne wëll d'Emweltberodung Lëtzebuerg asbl op dës Déieren opmierksam maachen an hiren Notze fir d'Biodiversitéit erklären.
Scho gewosst? D'Subside fir Solarenergie waren nach ni esou favorabel ewéi am Moment.
Dofir besicht de Site vun der Klima-Agence a gitt méi iwwert déi aktuell Bäihëllefe gewuer.
De SIAS huet zesumme mat senge véier Grënnungsmembere Conter, Sandweiler, Schëtter an Nidderaanwen de 7. Mee 2023 den 1. regionale
Klimadag organiséiert. Am Recyclingzenter Minsbech sinn d'Visiteure vun 10h30 bis 18h00 méi iwwert d'Klima a seng Verbindunge mat Energie,
Ressourcen, Kreeslafwirtschaft a Landwirtschaft gewuer ginn. Iwwert de ganzen Dag goufe flott Ateliere fir all Alter, live Virträg, interaktiv
Stänn, e Repair Café an Opféierunge fir Kanner ofgehalen. E klenge Réckbléck vum Dag kënnt Dir Iech an eiser Galerie ukucken.
Copyright : Fotoclub Gemeng Nidderaanwen
De Freiden, 5. Mee, hu mir zu Beetebuerg um NaturPakt Dag deelgeholl. Wann et moies op eng flott Visitt duerch de Beetebuerger Bësch an den Ellergronn gaangen ass, sou ass et mëttes mat interessante Virträg an der Remise vun den Trophäe weidergaangen. Niewent 40 anere Gemengen, hunn och mir eist Zertifikat iwwerreecht krut. Mir hunn iwwer 40% vun de Mesuren emgesat a steieren elo motivéiert op déi nächst Zertifizéierung duer. E grousse Merci un all déi Leit, déi doru bedeelegt waren!
De Sonnden, 7. Mee, hat d'Ëmweltkommissioun vun der Gemeng Nidderaanwen op de faire Brunch invitéiert. Eng knapp 70 Leit hunn et sech net entgoe gelooss, fir mat fair gehandelte Produite gutt an den Dag eranzestarten. An dësem Kader sinn och 2 Schecke vun de Kommissioune vun de 4 SIAS-Gemengen an der Héicht vu jeeweils 1.250€ for d'Stroossenenglen a Rokku Mi Rokka iwwerreecht ginn.
Als zertifiéiert Fairtrade-Gemeng wëlle mir eise Bierger de fairen Handel e bësse méi no bréngen. Kommt wärend de Fairtrade-Wochen nach bis den 14. Mee op d’Gemeng eis Ausstellung kucken. Dir kënnt Iech och um Jus, Téi, dem Schockela an de Kichelcher zerwéieren.
Mir hunn Är Meenung gefrot: vun 229 Ofstëmmunge bei eiser Ëmfro an der CityApp Nidderaanwen hunn 59,15% vun de Participanten uginn, dass si d'Ausschalte vun der ëffentlecher Stroossebeliichtung tëschent 1h00 a 5h00 an der Nuecht guttheeschen. Mat dëse Mesurë konnte mir soumat an deene leschte 6 Méint ronn 75.850 kWh aspueren. Gëtt d'ëffentlech Beliichtung nach weider iwwert dat ganzt Joer wärend dëser Zäit ausgeschalt, sou wäert eis Gemeng viraussiichtlech eng järlech Stroumaspuerung vu ronn 35%, géintiwwer vum vergaangene Joer, opweise kënnen.
Dir wëllt méi iwwert d'Thema vun den Energiespuermoossnamen am Beräich vun der ëffentlecher Beliichtung gewuer ginn?
Da liest Iech deen interessanten Artikel vum KlimaPakt duerch: www.pacteclimat.lu.
De Freiden, 31. Mäerz, hu mir als Gemeng am Kader vum KlimaPakt 2.0 eist Zertifikat iwwerreescht kritt. Mir hunn iwwer 65% vun de Mesuren ëmgesat a steieren elo motivéiert op d'Gold-Zertifizéierung duer. E grousse Merci un all d'Leit, déi doru bedeelegt waren!
An dësem Bäitrag vum Ëmwelt-Mëttwoch wëlle mir Iech zesumme mam SIAS an de Gemenge Schëtter, Conter a Sandweiler op de Klimadag, de 7. Mee, tëschent 10h30 an 18h00 am Recyclingcenter Munsbach alueden. Um Programm sti vill live Talks, interaktiv Stänn, Kanneraktivitéiten, eng Antigaspi Expo, sou wéi e Repair Café.
Wärend der Mobilitéitswoch 2022 huet d'Gemeng Nidderaanwen eng Ëmfro lancéiert, bei där d'Awunner d'Méiglechkeet haten, hir Iddien a Propose fir eng Verbesserung vun der Mobilitéit an der Gemeng eranzereechen. De Mëttwoch, 29. Mäerz, goufen den Awunner d'Resultater vun dëser Ëmfro am Centre des loisirs ,,Loisi'' presentéiert.
De Freiden, 24. Mäerz, ass um Campus ,,Am Sand'' e Liewenstuerm ageweit ginn, deen e Symbol fir den Erhalt vun der Aartevillfall soll sinn an an Zukunft e Liewensraum fir Insekten, Reptilien, Villercher a kleng Mamendéieren bidde soll. Sou sinn d'Etagë vum Tuerm mat verschiddene Materialie befëllt a ronderëm den Tuerm eng einheimesch Kraidermëschung geséit ginn. Zousätzlech si Beem a Straicher geplanzt ginn, déi duerch hir Bléie besonnesch bestäuberfrëndlech sinn. E flotte Projet vun eiser Ëmweltkommissioun an Zesummenaarbecht mam SIAS, dem Fierschter an eisem Gaardendéngscht.
Déi nei Ufuerderungen un d'Energieeffizienz gëlle säit dem 1. Januar 2023 a soumat gëtt d'Wärmepompel elo als Referenz-Heizsystem bei der Erstellung vun engem Energiepass fir en Neibau ugesinn. Liest Iech hei duerch den Artikel vun der Klima-Agence:
Wärend der Mobilitéitswoch 2022 hu mir als Gemeng eng Ëmfro lancéiert, bei där d'Awunner d'Méiglechkeet haten, hir Iddien a Propose fir eng Verbesserung vun der Mobilitéit an eiser Gemeng eranzereechen. Elo wëlle mir Iech d'Resultater vun dëser Ëmfro präsentéieren an invitéieren heifir häerzlech op den Informatiounsowend, den 29. Mäerz um 18h30 am Loisi! Kommt och Dir laanscht a loosst eis zesummen diskutéieren!
Setzt op d'Sonn, eng nohalteg an erneierbar Energiequell! Zesumme mat de Gemenge Schëtter, Conter, Sandweiler a Weiler-zum-Tuerm, dem SIAS an der Klima-Agence, invitéiere mir Iech op den Themenowend iwwer Photovoltaik, den 22. Mäerz um 19h00 am Centre Culturel zu Sandweiler. Eng Energie-Expertin vun der Klima-Agence beäntwert bei dëser Konferenz all Är Froen. Den Owend gëtt op Lëtzebuergesch ofgehalen an den Entrée ass gratis!
E klenge Bléck op d'Resultater vun eise Beméiunge fir an eise Gemengegebaier Energie ze spueren. Vun Oktober 2022 bis Januar 2023 konnte mir am Verglach zu leschtem Wanter am Ganze 16,5% Gas aspueren - esou kann et weidergoen!
Am Kader vum NaturPakt ass eis Gemeng an hirem éischten Audit mat 41,3% vun der maximaler Punktzuel an der Basiskategorie zertifiéiert ginn. Virun Allem am Beräich ,,Naturschutz allgemeng” hu mir mat 86,5% e grousse Schrëtt gemaach an eis Beméiungen droe Friichten. Esou kann et weidergoen.
Wéi eng Temperatur fir wéi ee Raum? Kuckt Iech déi interessant Infographik vun der Ëmweltberodung Lëtzebuerg un a spuert Suen duerch richteg Hëtzen!
Am Kader vum KlimaPakt ass eis Gemeng mat 73% vun der maximaler Punktzuel an der Kategorie 3 zertifiéiert ginn. Virun Allem am Beräich ,,Kommunikatioun, Kooperatioun'' hu mir mat 79% e grousse Schrëtt gemaach an eis Beméiungen droe Friichten. Esou kann et weidergoen.
Maacht vum 1. Februar bis den 31. Mäerz 2023 mat beim Energie-Spuerconcours vun der Klima-Agence a gewannt mat e bësse Chance en Elektrovëlo!
Energiespueren ass d'Gebot vun der Stonn. Vill Stéit iwwerdenken am Moment hir Gewunnechten a probéieren, keng Energie ze verbëtzen. Hutt Dir och wëlles, Ären Energieverbrauch ze optimiséieren, Är Ofhängegkeet vun Energieliwwerungen a Krisenzäiten ze reduzéieren a beim Klimaschutz bäizedroen?
Wat musst Dir dofir maachen?
Den Challenge vum Concours besteet dodran, den Energieverbrauch tëschen dem 1. Februar an dem 31. Mäerz 2023 ze reduzéieren. An dësen Zäitraum gëtt mam Zäitraum vum Virjoer verglach.
Fir deelzehuelen, musst Dir der Klima-Agence Är Verbrauchswäerter vum Virjoer schécken an op hirer Internetsäit www.energie-spuerconcours.lu hannerleeën, respektiv per Mail u spuerconcours@klima-agence.lu schécken. Dir fannt dës Wäerter am Espace-Client vun Ärem Energieversuerger.
Zum Schluss vum Zäitraum reecht Dir der Klima-Agence da fir dee selwechten Zäitraum vun dësem Joer d'Wäerter eran.
Fir weider Informatiounen iwwert de Concours an den Zougang op de Formulaire fir deelzehuelen, kënnt Dir op www.energie-spuerconcours.lu kucke goen.
Sech doheem oder op der Schaff e bësse méi waarm undoen an dofir
d'Heizung e bëssen erofdréinen, fir Energie ze spueren - maacht och Dir
mat beim europäesche Waarmepulloverdag, den 9. Februar.
Maacht mat bei eisem Gewënnspill op Facebook! Deelt Är Foto am waarme Pullover mat eis hei ënnert dëse Post op Facebook, setzt den #waarmepulloverdag a
gewannt mat e bësse Chance eng flott Drénkfläsch vun eiser Gemeng. De
Gewënner gëtt vun eis mat engem Post den 10. Februar 2023 annoncéiert.
An deene leschten Deeg huet et gutt gereent an et ass am ganze Land zu Héichwaasser an Iwwerschwemmunge komm. Ma wosst Dir, dass Dir Iech mat der App fir Waasserstänn an Héichwaasser Är eegen Alerten zesummesetze kënnt? Lued Iech elo ,,Meine Pegel'' erof (App Store | Google Play Store) a gitt mat Zäiten iwwert de Waasserstand an Ärer Regioun informéiert.
Am Joer 2022 huet eis Gemeng méi ewéi 70 Aktivitéiten am Kader vum Klimapakt lancéiert bzw. ëmgesat. Zu dësen Aktivitéiten ziele beispillsweis:
- de Start vum Ruffbus Syrdall zesumme mat der Gemeng Schëtter
- d'Aféierung vun der ëmweltfrëndlecher Charta fir Veräiner
- d'Kreatioun vun der Broschür fir ekologesch Subsiden
- d'Organisatioun vum éischte Repair Café den 18. Juni 2022 am Centre polyvalent ''A Schommesch'' mat insgesamt 18 Reparaturen
- d'Aktiounen zur Fërderung vum Krunnewaasser wéi d'Verdeelung vu gratis Waasserfläsche fir d’Schoulkanner an d'Personal an d'Installatioun vun 10 Waasserfontänen a kommunale Gebaier
- d'Workshoppen iwwert d'Richtlinne vum „Klimapakt“, dem Klimaupassungs- an dem Mobilitéitskonzept
- d'Deliberatioun vum Ressourcëkonzept, den Energiespuermesuren an den Haaptlinne vum Klimapakt fir 2030
Säit dem Joreswiessel stinn an eiser Gemeng insgesamt 4 Autoe bei eisen 3 Carsharing-Statioune vu Flex by CFL. Dës Statioune befanne sech:
- zu Nidderaanwen bei der Spuerkeess
- zu Ueweraanwen bei der Märei
- um Sennengerbierg beim Waassertuerm
Den Déngscht vu Flex‑Carsharing bitt iech d’Méiglechkeet een Auto fir eng gewëssen Zäit ze notzen, ouni een Auto mussen ze kafen. Fir vun dësem Déngscht profitéieren ze kënnen, braucht dir nëmmen d’ App vu Flex an een Abonnement. Fannt weider Informatiounen op flex.lu oder an dësem Flyer.
